ភ្នំពេញ៖ ប្រធានឧត្តមទីប្រឹក្សាផ្ទាល់ព្រះមហាក្សត្រ និងជាប្រធានគណបក្សប្រជាជនសម្ដេចតេជោ ហ៊ុន សែន បានផ្ដាំទៅអ្នកដែលប្រឆាំងមិនពេញចិត្តទិវាជ័យជំនះ ៧ មករា និងទិវាសន្ដិភាពនៅកម្ពុជា ២៩ ខែធ្នូ ឲ្យទៅចម្ការមីនដែលនៅសេសសល់នៅកម្ពុជា ដើម្បីសាកល្បងពីគ្រោះថ្នាក់។
សម្ដេចថ្លែងក្នុងខួប៤៥ឆ្នាំ នៃទិវាជ័យជំនះ ៧ មករា នៅព្រឹកថ្ងៃអាទិត្យនេះថា មានថ្ងៃទាំងពីរនេះទើបកម្ពុជាមានសន្ដិភាពដូចសព្វថ្ងៃ និងបានគាំទ្យដល់ការដាក់ថ្ងៃ២៩ ខែធ្នូ ជាទិវាសន្ដិភាពនៅកម្ពុជា ជាថ្ងៃឈប់សម្រាកផងដែរ។
សម្ដេចបានថ្លែងទៅកាន់អ្នកប្រឆាំងទិវាទាំងពីរនេះឲ្យទៅសាកល្បងរសជាតិនៃសង្គ្រាមដែលនៅសេសសល់នៅកម្ពុជា។
សម្ដេចថា៖ «បើអស់លោកអ្នកមិនពេញចិត្តនឹងការឈប់សម្រាកថ្ងៃ៧ មករា មិនពេញចិត្តនូវការឈប់សម្រាកនៅថ្ងៃទី២៩ ខែធ្នូ សូមអស់លោកអ្នកធ្វើដំណើរទៅកាន់ចម្ការមីនដែលនៅសេសសល់ដើម្បីសាកល្បងជាមួយនឹងគ្រោះថ្នាក់ដែលពួកអ្នកគួរតែប្រថុយ។ បើសិនជាលោកអ្នកពិតជាជើងឯកនៃអ្នកប្រឆាំង៧មករា និងសន្ដិភាព សូមលោកអ្នកទៅសាកល្បងដោយខ្លួនឯងនៅចម្ការមីនដែលនៅសេសសល់ដោះមិនទាន់អស់»។
សម្ដេចតេជោមានប្រសាសន៍ថា សន្តិភាពមានតម្លៃជាទីបំផុត ការបំផ្លាញសន្តិភាពមិនពិបាកទេ តែការបង្កើតសន្តិភាព គឺពិបាកណាស់ ពុំនោះសោតរាប់តំណមនុស្សក៏ពុំអាចបង្កើតសន្តិភាពបានដែរ។ អាស្រ័យហេតុនេះ យើងត្រូវសាមគ្គីគ្នារួមចិត្តតែមួយដើម្បីថែរក្សាសន្តិភាពដែលរកបានមកដោយលំបាកបំផុតនេះឱ្យគង់វង្សឋិតថេរ មិនឱ្យអានុភាពណាមកបំផ្លាញបានឡើយ ទោះបីត្រូវបង់ដោយតម្លៃណាក្ដី៕
